ဘရာဇီးလ်အသင်းနဲ့ ကိုလံဘီယာအသင်းတို့ ၁ ဂိုးစီသရေကျခဲ့တဲ့ ကိုပါအမေရိကဖလားအုပ်စုနောက်ဆုံးပွဲစဉ်မှာ ဘရာဇီးလ်အသင်းတောင်ပံကစားသမား ဗီနီစီးယက်စ်ကို ကိုလံဘီယာအသင်းနောက်ခံလူ မူနော့ဇ် ဂိုးဧရိယာအတွင်း ဖျက်ထုတ်ခဲ့တဲ့ဖြစ်ရပ်အပေါ် ပင်နယ်တီမပေးခဲ့တဲ့ ကွင်းလယ်ဒိုင်နဲ့ VAR တို့အမှားပြုလုပ်ခဲ့တယ်လို့ တောင်အမေရိကဘောလုံးအဖွဲ့ချုပ်က ဆိုခဲ့ပါတယ်။
ဘရာဇီးလ်အသင်းက ကိုလံဘီယာအသင်းကို ၁ ဂိုး- ဂိုးမရှိနဲ့ ဦးဆောင်ထားချိန်မှာ ဖြစ်ခဲ့တဲ့ဖျက်ထုတ်မှုမှာ မူနော့ဇ်ဟာ ဘောလုံးကိုမထိဘဲ ဗီနီစီးယက်စ်ရဲ့ခြေထောက်ကိုထိခဲ့တာပါ။ဘရာဇီးလ်ကစားသမားတွေဟာ ပင်နယ်တီတောင်းခဲ့ပေမယ့် ကွင်းလယ်ဒိုင်လူကြီးက ငြင်းဆန်ခဲ့သလို VAR ဒိုင်ကလည်း မူနော့ဇ်ဟာ ဘောလုံးကို ထိခဲ့တယ်ဆိုပြီး ပင်နယ်တီမပေးခဲ့တာဖြစ်ပါတယ်။
ဒီဖြစ်ရပ်နဲ့ပတ်သက်ပြီး တောင်အမေရိကဘောလုံးအဖွဲ့ချုပ်က”ပင်နယ်တီဧရိယာအတွင်း ဖျက်ထုတ်မှုမှာ နောက်ခံလူဟာ ဘောလုံးကို ထိခဲ့ခြင်းမရှိပါဘူး။ဒိုင်လူကြီးက ပွဲကိုဆက်ကစားဖို့ခွင့်ပြုခဲ့သလို နောက်ခံလူ ဘောလုံးမထိခဲ့တာကို VAR က ဖော်ထုတ်နိုင်ခဲ့ခြင်းမရှိပါဘူး။အဲ့ဒါကြောင့် VAR ဟာ ကွင်းအတွင်းဆုံးဖြတ်ချက်ကို မှားယွင်းစွာအတည်ပြုခဲ့ပါတယ်”လို့ ထုတ်ပြန်ခဲ့ပါတယ်။
ဒီဆုံးဖြတ်ချက်ဟာ ဘရာဇီးလ်အသင်းအတွက် အများကြီးထိခိုက်ခဲ့ပြီး ၂ ဂိုး-ဂိုးမရှိနဲ့ ဦးဆောင်နိုင်မယ့် အခြေအနေကနေ ၁ ဂိုးစီသရေကျကာ အုပ်စုဒုတိယသာရရှိခဲ့တာပါ။အဲ့ဒါကြောင့် ဘရာဇီးလ်အသင်းဟာ ကိုပါအမေရိကဖလားကွာတားဖိုင်နယ်ပွဲစဉ်မှာ ဥရုဂွေးအသင်းနဲ့ ယှဉ်ပြိုင်ရမှာဖြစ်ပါတယ်။
