၂၀၂၆ ကမ္ဘာ့ဖလားခြေစစ်ပွဲ(အာရှဇုန်)တတိယအဆင့်အတွက် အုပ်စုမဲခွဲမှုပြုလုပ်ခဲ့ရာ အင်ဒိုနီးရှားအသင်းဟာ အာရှထိပ်သီးအသင်းတွေဖြစ်တဲ့ ဂျပန်၊သြစတြေးလျ၊ဆော်ဒီအသင်းတို့နဲ့ တစ်အုပ်စုတည်းကျရောက်နေတာဖြစ်ပါတယ်။
အရှေ့တောင်အာရှအသင်းတွေထဲမှာ တတိယအဆင့်ကို တက်နိုင်တဲ့ တစ်သင်းတည်းသောအသင်းဖြစ်တဲ့ အင်ဒိုနီးရှားအသင်းဟာ ကမ္ဘာ့ဖလားခြေစစ်ပွဲ(အာရှဇုန်)အဆင့်ကို ပထမဆုံးအကြိမ်ယှဉ်ပြိုင်မှာပါ။အင်ဒိုနီးရှားအသင်းဟာ တတိယအဆင့်အုပ်စုမှာ ဂျပန်၊သြစတြေးလျ၊ဆော်ဒီအသင်းတို့အပြင် ဘာရိန်း၊တရုတ်အသင်းတို့နဲ့ပါ တစ်အုပ်စုတည်းကျရောက်နေတာဖြစ်ပါတယ်။
အင်ဒိုနီးရှားအသင်းအနေနဲ့ ကမ္ဘာ့ဖလားပြိုင်ပွဲကို ယှဉ်ပြိုင်ခွင့်ရဖို့အတွက်ဆိုရင် အဆင့် ၄ အတွင်းဝင်ရောက်အောင်လုပ်ဆောင်ဖို့လိုအပ်တာပါ။ခြေစစ်ပွဲတိုက်ရိုက်အောင်မြင်မယ့် ထိပ်ဆုံး ၂ နေရာကို ရယူဖို့ အင်ဒိုနီးရှားအသင်းအတွက် မလွယ်ကူတာကြောင့် အဆင့် ၃ နဲ့ ၄ ကို ရအောင်ယူပြီး နောက်ထပ်စတုတ္ထအဆင့်ယှဉ်ပြိုင်နိုင်အောင် ကြိုးစားရမှာဖြစ်ပါတယ်။
၂၀၂၆ ကမ္ဘာ့ဖလားခြေစစ်ပွဲ(အာရှဇုန်)တတိယအဆင့် နောက်ထပ်အုပ်စုပွဲစဉ်တွေအဖြစ် အုပ်စု A မှာ အီရန်၊ကာတာ၊ဥဇဘတ်ကစ္စတန်၊ယူအေအီး၊ကာဂျစ္စတန်နဲ့ မြောက်ကိုရီးယား၊အုပ်စု B မှာ တောင်ကိုရီးယား၊အီရတ်၊ဂျော်ဒန်၊အိုမန်၊ပါလက်စတိုင်းနဲ့ ကူဝိတ်တို့ တစ်အုပ်စုတည်းကျရောက်နေတာဖြစ်ပါတယ်။