ယူနိုက်တက်အသင်းဟာ နွေရာသီအပြောင်းအရွှေ့မှာ တိုက်စစ်မှူး ရက်ရှ်ဖိုဒ့်အတွက် ကမ်းလှမ်းမှုတွေကို နားထောင်သွားတော့မယ်လို့ သတင်းတွေထွက်ပေါ်လာခဲ့ပါတယ်။
ယူနိုက်တက်အသင်းဟာ နည်းပြ အဲရစ်တန်ဟတ်ကို လာမယ့်ရာသီအသင်းကို ဆက်ပြီးကိုင်တွယ်စေဖို့ ဆုံးဖြတ်ခဲ့တာကြောင့် ရက်ရှ်ဖိုဒ့်ဟာ အသင်းကနေ ထွက်ခွာရဖို့ရှိလာတာပါ။ရက်ရှ်ဖိုဒ့်ဟာ ပြီးခဲ့တဲ့ရာသီက အသင်းအတွက် ခြေစွမ်းပြသနိုင်ခြင်းမရှိသလို ကွင်းပြင်ပက အပြုအမူတွေကို နည်းပြ အဲရစ်တန်ဟတ်က နှစ်သက်မှုမရှိတာဖြစ်ပါတယ်။ဒတ်ချ်လူမျိုးနည်းပြဟာ ပြီးခဲ့တဲ့ရာသီမှာ ရွေးချယ်စရာမရှိသလောက်နည်းပါးခဲ့လို့ သူ့နဲ့အဆင်ပြေခြင်းမရှိတဲ့ ရက်ရှ်ဖိုဒ့်ကို ဆက်ပြီးအသုံးပြုခဲ့တာပါ။
အခုအချိန်မှာတော့ သူတို့ ၂ ဦးဆက်ဆံရေးဟာ လုံး၀အက်ကွဲသွားပြီဖြစ်လို့ ယူနိုက်တက်အသင်းဟာ ရက်ရှ်ဖိုဒ့်ကို ရောင်းချဖို့ စဉ်းစားလာတာဖြစ်ပါတယ်။ယူနိုက်တက်အသင်းဟာ ရက်ရှ်ဖိုဒ့်အတွက် ပြောင်းရွှေ့ကြေး ပေါင်သန်း ၈၀ သတ်မှတ်ထားပေမယ့် ပြီးခဲ့တဲ့ရာသီက သူ့ရဲ့စွမ်းဆောင်ရည်တွေကျဆင်းမှုကြောင့် ဒီပမာဏကို လျှော့ချရတော့မှာပါ။
ရက်ရှ်ဖိုဒ့်ကို ခေါ်ယူဖို့ ပီအက်စ်ဂျီအသင်းက စိတ်ဝင်စားနေပေမယ့် သူကတော့ ယူနိုက်တက်အသင်းမှာပဲ ဆက်ပြီးရှိချင်နေတာဖြစ်ပါတယ်။ရက်ရှ်ဖိုဒ့်နဲ့ ယူနိုက်တက်အသင်းတို့ချုပ်ဆိုထားတဲ့ စာချုပ်ဟာ ၂၀၂၈ ခုနှစ်အထိ ရှိနေတာဖြစ်ပါတယ်။
