ဂျော်ဂျီယာအသင်းဟာ စပိန်အသင်းနဲ့ကစားခဲ့တဲ့ ပြီးခဲ့တဲ့ပွဲတွေမှာ ရလဒ်ကောင်းတွေမရယူနိုင်ခဲ့ပေမယ့် အခုက မတူညီတဲ့ပွဲဖြစ်တဲ့အတွက် အများကြီးဖြစ်သွားနိုင်တယ်လို့ ဂျော်ဂျီယာအသင်းနည်းပြ ဆက်ဂ်ညောက ဆိုခဲ့ပါတယ်။
ဂျော်ဂျီယာအသင်းဟာ ယူရို ၂၀၂၄ ပြိုင်ပွဲကို ဝင်ရောက်ယှဉ်ပြိုင်နေတဲ့ အသင်းတွေထဲမှာ အင်အားနည်းတဲ့ အသင်းဖြစ်ပေမယ့် အုပ်စုတွင်းနောက်ဆုံးပွဲစဉ်မှာ ပေါ်တူဂီအသင်းကို အနိုင်ရပြီး အကောင်းဆုံးအုပ်စုတတိယနဲ့ ၁၆ သင်းအဆင့်ကို တက်နိုင်ခဲ့တာပါ။ဂျော်ဂျီယာအသင်းဟာ ယူရိုပြိုင်ပွဲကို ပထမဆုံးအကြိမ်ဝင်ရောက်ယှဉ်ပြိုင်တဲ့ ဒီပြိုင်ပွဲမှာ ၁၆ သင်းအဆင့်ကို တက်နိုင်ခဲ့တာဖြစ်ပါတယ်။
စပိန်အသင်းကတော့ အုပ်စုတွင်းမှာ ပွဲတိုင်းအနိုင်ရပြီး ပေးဂိုးမရှိနဲ့ ၁၆ သင်းအဆင့်ကို တက်လာခဲ့တာပါ။ပြီးတော့ စပိန်နဲ့ ဂျော်ဂျီယာအသင်းတို့နောက်ဆုံးတွေ့ဆုံခဲ့တဲ့ပွဲတွေမှာ စပိန်အသင်းကပဲ နိုင်ပွဲရယူနိုင်ခဲ့တာဖြစ်ပါတယ်။အဲ့ဒါကြောင့် ဒီပွဲမှာလည်း စပိန်အသင်းပဲ အနိုင်ရဖို့ အလေးသာနေတာပါ။
ဂျော်ဂျီယာအသင်းနည်းပြ ဆက်ဂ်ညောက “စပိန်ဟာ အုပ်စုအဆင့်မှာ အလွန်ကောင်းတဲ့အရာတွေ အများကြီးပြသခဲ့သလို ဂျော်ဂျီယာကလည်း စိတ်ဝင်စားစရာကောင်းတဲ့အရာတွေပြသခဲ့ပါတယ်။စပိန်အသင်းဟာ ပြိုင်ပွဲရဲ့အကောင်းဆုံးအသင်းဖြစ်တဲ့အတွက် ဒီပွဲဟာ ခက်ခဲမယ့်ပွဲပါ။ကျနော်တို့ဟာ သူတို့နဲ့ နောက်ဆုံးကစားတဲ့ ၄ ကြိမ်စလုံးအရေးနိမ့်ခဲ့ပါတယ်။ဒါပေမယ့် ဒါက မတူညီတဲ့ပြိုင်ပွဲဖြစ်လို့ အများကြီးဖြစ်သွားနိုင်ပါတယ်”လို့ဆိုခဲ့ပါတယ်။
စပိန်အသင်းနည်းပြ ဒယ်လာဖူအန်တီက သူတို့ဟာ ဂျော်ဂျီယာအသင်းကို ပေါ့ပေါ့တန်တန်ကစားသွားမှာမဟုတ်ဘူးလို့ ပြောထားတာဖြစ်ပါတယ်။
