UFC ဝိတ်တန်း ၂ ခုချန်ပီယံဟောင်း မက်ဂရီဂေါဟာ ယူရို ၂၀၂၄ ဗိုလ်လုပွဲမှာ စပိန်အသင်းက အင်္ဂလန်အသင်းကို အနိုင်ရပြီး ချန်ပီယံဆုကို ရယူနိုင်မယ်လို့ ယုံကြည်မှုရှိနေတာကြောင့် စပိန်အသင်းအနိုင်နဲ့ ဂိုးရလဒ်ကို လောင်းကြေးထပ်ခဲ့ပါတယ်။
မက်ဂရီဂေါဟာ စပိန်အသင်းက အင်္ဂလန်အသင်းကို ၃ ဂိုး-၁ ဂိုးနဲ့ အနိုင်မယ်ဆိုပြီး ဂိုးရလဒ်ကို ယူရို ၁ သိန်းလောင်းကြေးထပ်ခဲ့သလို စပိန်အသင်းအနိုင်အတွက်လည်း ကြီးမားတဲ့လောင်းကြေးတစ်ခုကို ထပ်ခဲ့တာပါ။မက်ဂရီဂေါအနေနဲ့ ဒီလောင်းကြေး ၂ ခုစလုံးကို အနိုင်ရမယ်ဆိုရင် သူလောင်းထားတဲ့ လောင်းကြေးအပါအဝင် ယူရို ၃.၇ သန်းကို ရရှိမှာဖြစ်ပါတယ်။
ယူရိုဗိုလ်လုပွဲကျင်းပမယ့်နေ့မှာ အသက် ၃၆ နှစ်ပြည့်မယ့် မက်ဂရီဂေါဟာ ကံကောင်းဖို့ကိုလည်း သူ့ရဲ့ဆိုရှယ်မီဒီယာမှာ ရေးသားခဲ့တာပါ။မက်ဂရီဂေါဟာ ကိုပါအမေရိကဖလားပြိုင်ပွဲမှာ မက်ဆီရဲ့အာဂျင်တီးနားအသင်းချန်ပီယံဖြစ်ဖို့ကို ယူရို ၃ သိန်း ၆ သောင်းကျော်လောင်းကြေးထပ်ခဲ့ပြီး ယူရိုပြိုင်ပွဲမှာ ရော်နယ်ဒို ရွှေဖိနပ်ဆုရမှာကို ယူရို ၆ သောင်းလောင်းကြေးထပ်ခဲ့တာဖြစ်ပါတယ်။
မက်ဂရီဂေါဟာ ရော်နယ်ဒို ရွှေဖိနပ်ဆုရမယ့် လောင်းကြေးကို ရှုံးခဲ့ပေမယ့် ကျန်တဲ့လောင်းကြေးထပ်ထားတွေကို အနိုင်ရဖို့ မျှော်လင့်နေတာဖြစ်ပါတယ်။
